Galatians 4

1Ama fye pa ge n za dada fi, wafa nyabwa dnagmayi ya zhi wo ɓi, n woto mwan, ɓihi to du fyenu lon, sai wola mwa koda-yake, anya vinya n wo dada ɓei fa nyi ɓa zhin wa nyanu. 2Tile wa zhin ɓo n wa guyi a gna wo ge wo zhin, sai wo la si ʼye n wo dada ɓei da.

Shekwoyi Nu Na Lo Yi Ya

3Kwo ɓei wu lonu n yi-i kafin Kristi wo ɓe, Yi ɓei zhin a Yahudiyi awyidna, n na ɓo kni yi afyenu nu, ntuge yi ɓei gye ge ɓa ɓa mi ɓa gni yi nu. 4Ama sa n sa manayi ɓo la si, sa n Shekwoyi ɓei kni, wa tnu n wo Nugun yi n nyikwoza ba, n na Yahudiyi mi. 5Wa si lo-loya gayi n yi ɓei zhin kwo afyenu nyi, n nabai wa zeyi wa ʼɓi. 6Ntuge yi zhin wa ʼɓi nu, Shekwoyi la tnu n wo Nugun Zafun yi n yi abugba mi, ntu cenu yi ɓa mi ya yi Shekwoyi ge eyi Dada ye-ye yi. 7Yito ye shan a bara nu zhin, ama Shekwoyi aɓi. Shi yi zhin wa ʼɓi nu nyi, nya wo cei vinya kwo zhin yi nya nu, gama nya nu Shekwoyi wa zhin shiri.

8Kafin ofye abyedo fye kpe Shekwoyi ye, fye ɓei zhin ashan afyenu nu n ɓa to n wye-wyei nyin. 9Ama nsaiye shi fyela Shekwoyi bwa nyi (ko miɓa cige Shekwoyi nku fye bwa) ko ɓa zhin wuna nu fya jeze n na vunyi, fya ze afyenu n jesun nya aba n kwo to n kalayin, wyekwoyi, adini n kwo to na pmayi n, fyei zhin a tna fya lo she ntu owa bwashi ɓo? 10Fye zhin atna fya bwa Shekwoyi agmada n nya yi n fye zhin, kwo nfye ta zhin m, n na anyipyeyi hoyi, ko apya ho, ko ayeho yi m. 11Edna wo mi lo ntu fye ɓo. Edna wo mi lo, kwo emi tnu-tnu vinya n fya ba ɓa ze gbeloyi.

Bulus Bugba Zhi-zhiyi

12Omi azaje ye-yeyi, a wo mi lo ngye fye ku ze ngye mi, fya wo shi a wo mi lo tu aɓeye tukwo, gama mi kni-kniyi lo n na agma ye shi fye ɓei kni-kniyi nyi. Fye to ɓei ci mi wyegba esa n mi ɓei kmi fye waʼazi zhin nyi m. 13Ko dayake, nyasan ɓei san mi esa n mi ɓei kmi fye ɓe n Nabari manayi Kristi nya yi nyi. 14Ko da shike emi nyasan ɓei dami n fyei fye to ɓei nami aɓo fya nya mi yan. Awo, fye ɓei lami fya zhin mi ɓo ngye Shekwoyi malaika ko ngye Yesu Kristi n wohin.

15Zafun agmada nya gni na n yi i ɓei gni bwa nyi a? Gama mi kpe lo n na anyipyei hi fye ɓei ɓa kun fya wye n na agmadai fya ga mi–fye ɓei gna fya gye kwo n bmazhinyi n ma ba.

16Nsaiye, mila ze fye nunɓayi nu, shi ma gna fye gaiciya.

17A malami a katai n ɓa ye fye n tu n fye nyabwa ɓo nu nyi, ɓata zhin ce ntu fye bmazhin ɓo nun. Nya n ɓa zhin atna ɓa zhin nyi, ɓa ye ɓa ka fye ya n minu, n na bai fya wo ɓanu. 18Kwo zhin ɓemana nu aza ye fye, n ɓa ye fye n na bugba manayi n bugbayi gmanyi, ngye ɓata ye fye ntuge mi kunsun lo nfyei nun. 19O, emi aɓi, fye knimi cilo, mi gni miyi gye azhin shi gye n ɓiya zhi wa gye, woi pmi wa ma ɓi nyi. Mi-i pmi sa n na ɓei nu fye n Kristi yi nyi. 20Awo mi lo ngye miye gnilo n fyei to ma shan ɓeda layin, ama ntu na ba kpa mwa ɓo layi, mita kpe ɓeye lo n mi ɓa zhin.

21Fye wo mi ɓeda, efye a nugundo n fye zhin nubo ge, sai za shi awyidna bwanu za pwo nyi, knido nu zhin to fyei ɓa nya awyidna ye awyega ɓon ma? 22Gama a cei kafi, Ibrahim ɓei n na ɓiyi ngun aba, gmanyi owo nyiko bara ɓi, gmanyi owo nyikwo la-layi ʼɓi. 23Nyaho to lo n kwo zhin nukwoyi lo n owo nyikwo bara ɓiyin. Ama aɓo ma nyikwo la-layi ɓi n Shekwoyi alkawali avun nu ge wo ɓa tnu n woi.

24– 25Nsaiye, nabari gaiciya nya ye zhin yi misali nu n Shekwoyi a zokwoyi n gun aba n wo bma za zhin. Wo ɓei zhin ce n Sinai pe sanu n wo ɓei ga Musa awyidna ngun awo. A Larabawa yi Sinai pe nge Hajaratu pe; dna n mi misali, Ibrahim nyikwo bara ɓi zhin Urushelima nu, a Yahudiyi yi nɓa vi zokwoyi nyi ɓanu zhin bara ɓi. 26Amaeyi zhimi zhin Urushelima eshe nya nu, kwoi to zhin a Yahudiyi aɓo kni fyenu nun.

27Nyanu n Ishaya ɓei da sanu n wo ɓei zhin anabci ncei ge, “Nsaiye fye ɓa mi fya dagma. Lama, ho ɓa fi aku n na agmadai koda yake hoto shin ʼɓi man. Ntuge miye ma ga ho aɓi nu n mwa begye, ndu do n ho nyikwo-fyenu ɓei n cei.”

28Efye n miyi, emi azaje, eyi nu zhin aɓi n Shekwoyi ɓei zhin alkawali, shi wo ɓei zhin Ishaku nya nyi. 29Ntu cenu, eyi n Zafun Gyi-gyi-yi la yi ma nyi, yi sin wahala n aza kun n ɓa ye ya shi a Yahudiyi awyidna bwa nyi. She Ishaku oɓi alkawali nya bei sin wahala n smailu akun n wo nu ɓo zhin fyenu nyikwo-ɓi nyi. 30Ama littafi a da ge, Shekwoyi ɓei gna Ibrahim ge, wo la fyenu-nyikwo n wo eɓi yi nyaya, ntu ge fyenu-nyikwo ɓi ta gyi Ibrahim puwa gado n kni gado yi n gnisun n nyikwo la-layi ʼɓi yin. 31Emi azaje, yito zhin afyenu aɓinun, n yi ɓa vi a Yahudiyi awyidnan, ama nyikwo la-layi aɓi nu, aza a gwo-gwoi n Shekwoyi aba ntu gaiciyaga ɓo.